Na variante media, os inscritos disputaron o percorrido Score cun obxectivo máis modesto e lúdico, xa que gran parte dos corredores desta modalidade fixeron o percorrido en familia ou formando pequenos grupos de amigos, moitos deles descubrindo o deporte da orientación. A dificultade engadida que supón realizar esta proba en ausencia de luz provocou que os tempos dos participantes se alargasen, chegando algúns deles fóra do tempo establecido. En categoría feminina, o podio estivo composto por Eva Casado en primeiro lugar, Inés Valiño e Ainoa Delgado, pechando os postos de honra. En canto á categoría masculina, Pablo Fernández gañou a proba, mentres que David Casado e José Manuel Fernández quedaron segundo e terceiro, respectivamente.

Ao mesmo tempo, os máis pequenos desfrutaron dun pequeno percorrido infantil de apenas 1,5 km nos arredores de Casa de Sixto, buscando balizas coa axuda da familia e navegando por un mapa moi detallado e preciso, de fácil comprensión.

Dende o Clube Gallaecia Raid quixemos dar as grazas, en primeiro lugar, aos participantes pola súa asistencia, a Casa de Sixto e ao Concello de Paderne pola súa implicación na organización deste evento e, por suposto, aos nosos patrocinadores: Consello Superior de Deportes, Deputación da Coruña, Secretaría Xeral para o Deporte, FEDO, FEGADO, Cruz Roja, Ciclos Quintena, Decathlon A Coruña, Tracktherace, Marmar, SpacioSalud, Bibi’s Natura, Maldita Buena Suerte e Nosportlimit.

Por último, deixámosvos a galería de fotos da proba e as clasificacións.